He tukinga, he pahūtanga, he whānau kua mau ki rō wēne e kā ana, Taupō te 24 o Āperira 2009
Te Whakarākai Tohu Māia o Aotearoa
MO7756 Kaiwawao Michael O'Leary
Te Mētara Tohu Māia o Aotearoa
Kirirarau Conor O’Leary
Te Mētara Tohu Māia o Aotearoa
Kirirarau Peter Booth
Kaiwawao Michael O'Leary and his son Conor O'Leary
I te 3.55pm I te 24 o Āperira 2009, e taraiwa noa iho ana a Kaiwawao Michael O’Leary me tōna whānau i te Huarahi Matua Kotahi e āhua 17 kiromita ki te raki o Taupō. Kāore ia e mahi ana. He wēne Toyota te waka i mua i a rātou, ā, tukia rawatia atu ki tētahi waka pango e haere mai ana, ihu ki te ihu. Tokoono ngā tāngata o roto, nā, ka kauhuri te wēne ki te takiwā, ka tau ki tōna muringa, ā, e whā ngā wā ka pīrori haere i mua o te putanga i te rori, te hekenga i tētahi maioro pātītī, ā, papahū ana.
Ko Kaiwawao O’Leary te tangata tuatahi i tae ki te tukinga. Ka whakahaua tana tama kia rotarota atu ki ngā waka e whakatata mai ana, ā, ka mātua haere ia kia kite i te waka pango. Ka whakataungia kāore he tohu ora o te taraiwa tāne. Ka whakawhiti ki tērā atu taha ka kite i te pāhihi wahine e ora iti ana, he waewae pea kua whati me ētahi atu wharanga. Ka mea atu ia he āwhina e haere mai ana, ā, ka tau te whakaaro kia kaua ia e unuhia i te waka.
Ka rongo i te pahūtanga ka titiro ki tāwāhi o te rori ka kite e muramura ana te wēne. Ka whakawhiti a Kaiwawao O’Leary i te rori engari nā ngā mura me te koki o te maioro i raru ai te haerenga pēnā ki te wēne. I reira tētahi atu tangata e haere ana i te rori he kēne tinei ahi tāna ka tū atu ki te āwhina. Ko Peter Booth tōna ingoa. I muri mai o tana kōrero poto ki a Mr Booth, ka oma atu ki raro mā te maioro, ka peke i tētahi taiapa waia kia tae ki tērā atu taha o te waka. Mai i reira i kite ia i ētahi tamariki tokorua kei waho o tētahi matapihi e tauwhare ana mai i ō rāua uma. Ka kaha haere te mura o te ahi ki runga i a ia ka hūtia tētahi tama i te wēne, e rua tau te pakeke, ka oma ko tōna 15 mita atu i te waka mura, ā, i reira ka amohia te tamaiti e te tamāhine a Kaiwawao O’Leary ki tō rātou ake waka. Kātahi ia ka hoki ki te wēne ki te whakarauora i te tamaiti tuarua, ko tana tama hoki a Conor i haere i a ia.
Ināianei kua kī katoa a roto o te wēne i te ponguru, kua kaha ake te muranga me ētahi pahūtanga iti nō roto mai o te waka. Ko rātou tokotoru a Kaiwawao O’Leary, tana tama a Conor me Mr Booth, i mate ki te tango mai i te tama tuarua engari i mau tonu ki roto me te mahara nā te tātua pea o tōna tūru i mau ai, ā, ka panaia rātou e ngā mura o te ahi. Nā, i te manawanui o Kaiwawao O’Leary kia kaua e mate te tamaiti tuarua ka pātai ia mena rā he naihi tā tētahi. Maringanui i a Mr Booth tētahi naihi pūkoro e mau ana i a ia i tōna haerenga ki te āwhina. Ka kapohia e Kaiwawao O’Leary, ka tāwhana ki roto i te waka, ka tapahia te mea i pupuri rā i te tamaiti. Nā rātou tokotoru i kukume mai te tama e kā ana tōna tarau i waho rawa atu o taua waka. Ka wetekina e Kaiwawao O’Leary ngā pueru e mura ana i te kiri o te tamaiti, ā, ka haria atu ki tētahi wāhi haumaru. Ināianei kua muramura pai te wēne, kore rawa e taea he rauoratanga i muri mai.
Ahakoa rā i wera hoki ko Kaiwawao O’Leary i mārō tonu tana whakahaere i te wāhi o te tukinga, inā rā ko te poipoi i te hunga i whara kia tae rawa mai te Pirihimana me ērā atu Ratonga whawhati tata. I muri atu ka haria ia ki te hōhipera mō ōna weranga. Ahakoa wetiweti rawa taua tukinga i mua i a ia, i mauritau, i pūngaio tōna mau i a ia me te whakaatu i tētahi māia kē atu e rite ana ki tā tana whakahaere tuatahi i taua wāhi tukinga. Me te aha, i korikori ki te whakarauora i te hunga i mau rā ki roto o te wēne e mura ana. I te wā o ngā whakarauoratanga he pitomata i reira ka pahū noa mai te kura peniheni o te wēne ka whakamate i a ia, ka kino rānei tōna taotū me ērā hoki i tōna taha.