1952 - Pouaromātai Bruce Christoffersen

Translate into English

He taiohi maupū kūpara ike me te whāinga tūkino, Te Papaiōea, te 20 o Nōema, 1952

Te Mētara o Hōri
4099 Pouaromātai Bruce Christoffersen

I te 20 o Nōema 1952, i uia e Pouaromātai Christoffersen tētahi taiohi i whakapaetia nāna ētahi pāhua i te rohe o Te Papaiōea. I whakahokia e ia te tama ki te kāinga o ōna mātua me te inoi kia toro ia i tona whare mahi. Kāore te tama i whakaae. I mea ia kei tōna wāhi mahi kē te kī. I whakaaetia kia wehe ia, kia tīkina atu te kī.

Nōna ka ngaro, ka urutomokia te whare mahi e Christoffersen me te pāpā o te tama ka tūpono ki te hāmanu, ki tētahi raiwhara poro me ētahi atu rākau patu.

Ka auraki mai te tama me tētahi atu taiohi e mau raiwhara ana. Ka toropuku te haere a te taiohi tuarua mā muri o te whare, ā, ka whakawetiweti te tama tuatahi i tōna pāpā me Christoffersen ki tētahi pū. Ka rongo a Christoffersen e aue ana te māmā o te tama tuatahi, ka oma atu ki muri o te whare ki te āwhina.

Ka whakamātau a Christoffersen ki te whakaware me te whakapura i te tama tuarua mā te whiu kirikiri ki tōna kanohi, engari ka pūhia tōna uma, ā, kino rawa atu te tūnga. Ko ngā kaihara,16 me 17 ngā pakeke, ka pūrere atu me ngā raiwhara poro e rua, .22 kūpara me te hāmanu, tētahi raiwhara hākinakina tere whaiahu, tētahi raiwhara .303 kūpara, tētahi pītara hau takiwā me te manomano rauna o te hāmanu.

Ā, nāwai rā ka mau ngā taiohi nei i muri mai o tētahi rapunga kaihara whānui, neke atu i te 50 ngā pirihimana nō ngā takiwā o Te Papaiōea me Te Whanganui a Tara nā rātou i haurapa ngā tahataha puke me ngā ngahere e karapoti ana i te Wharehiko o Mangahao. Ka whakatautia kua hara te tokorua, ā, e whā tau herenga te whiu.

Kua titi tonu atu te matā ki te uma o Pouaromātai Christoffersen mō te roanga o tōna ora, ā, me te aukati i tōna tumanako kia eke poutama anō i ana mahi. I mate ia i Ahuriri i te 20 o Pēpuere 1978 i muri mai o tētahi māuiui poto. I mahue mai i a ia tōna hoa wahine me ngā tamariki tokotoru.

E ai ki te kupu hautoa o te Mētara o Hōri mō Pouaromātai Christoffersen he mea whakaatu e ia te māia nui me te manawaroa.