He taitama tekau mā whā ngā tau, he maupū, he mōrearea, Maunganui, te 23 o Hune 2007
Te Whakarākai Tohu Māia o Aotearoa
JMH728 Pirihimana James Muir
Pirihimana James Muir
I te 3am i te 23 o Hune 2007, i kitea tētahi waka kua whānakotia e tomo ana ki Maunganui. E taraiwangia ana te waka e ētahi taiohi tokorua 14 ngā tau kua pūrere atu i tētahi kaupapa ngahere mō te Tamaiti, te Taiohi me te Whānau, i kō noa atu o te whārua o Ruātoki. I murua e rāua ētahi kāinga tuawhenua e rua, arā, i whānako i ētahi pū, i te hāmanu me te waka. I taraiwa atu ki Whakatane me te taka anō ki te hē. He mea whakahau a Pirihimana James Muir (41) me tana kurī me Neo kia hono atu ki te arumanga.
I te wā e arumia ana te waka, ka kuhu te pāhihi i te tūru o muri ka whītiki i a ia ki tētahi raiwhara .303 ka tīmata ki te puhipuhi i te Pirihimana me te waka hoki o Pirihimana Muir. I taua wā ka pōrori haere te waka o te kaihara, he mea poka ōna taea e te Pirihimana i mua ake rā i te wā o te arumanga. Nā tēnā i mate ai te waka i tū noa iho. Ka kite atu a Pirihimana Muir e noho mōrearea ana tōna hoa, ā, ka āwhina atu mā te whakatū i tōna waka i muri tonu i te waka o te kaihara.
I tēnei wā kua heke tētahi atu pirihimana i tōna waka kua ngana ki te mauhere i te taraiwa o te waka o te kaihara. Ka whakaanga te taiohi i noho rā ki muri i tana pū ki te Pirihimana. I runga i te wehi ka pūhia ia ka huna te pirihimana i muri i tētahi pakitara tūtata. Kātahi ngā pirihimana ka wero atu, ka whiu kupu ki ngā taiohi tokorua kia whakahauraro rāua. Ko te taiohi mau raiwhara ka whakaanga tuatahi ki tērā atu pirihimana kātahi ka huri te pū ki a Pirihimana Muir. I tētahi wāhanga ka kite a Pirihimana Muir i te taiohi e puru ana i te pū, ka rongo e ngete ana i te pēhanga o te keu. Maringanui kāore he kariri o roto. Kātahi te taraiwa o te waka kaihara ka puta, ā, ka whakahauraro. Ka puta hoki tērā atu taiohi maupū i te waka ka neke ki tō tērā atu pirihimana waka e kā tonu ana. I mua o tōna taenga ki te waka ka tuku a Pirihimana Muir i tana kuri i a Neo ka mau ia. Waihoki ka ngana tērā atu taiohi ki te pūrere atu, auare ake, ka mau hoki ko ia.
He mauritau, he pūngaio hoki te tū a Pirihimana Muir i te aroaro o tētahi tukinga mōrearea, hohoro nei te panoni haere, ā, kāore hoki e taea e ia te whakahaere. Me te aha, kotahi anake te whiringa ko te āwhina i tōna hoa. I te roanga o te tukinga mārama kau ana ka pūhia pea ia e tētahi kaihara kāore ōna aha ki te pupuhi i tana pū e taea ai tana pūrere atu.