Te Mētara o Hōri
4601 Pirihimana Matua Peter Umbers (murimate)
Left: Pirihimana Matua Peter Umbers.
Right: Sue Umbers receives her husband’s medal.
I te 27 o Mei 1990, ka tū tētahi pāhua i Poolburn Hotel pātata ki Ranfurly. Ka whakaara te kaihara i ngā kaipupuri o te hōtēra i te moe, ka tīhorea te nuinga o ngā waea hei ārai i te waeatanga atu ki te Pirihimana, ā, ka pūrere atu e $380 i a ia. Ka whakapā atu ngā kaipupuri o te hōtēra ki te Pirihimana mā te waea i tō rātou rūma moe i mahue i te kaihara. I te kāinga a Pirihimana Umbers i te wā i waeatia ai ia i muri tata mai o te weherua pō.
I taraiwa atu a Pirihimana Umbers ki waho atu o Ranfurly. I te 16 meneti mai i te weherua pō ka whakamōhio atu ki te Pūtahi Whakahaere o Ōtepoti e whakatū ana ia i tētahi Toyota Hilux i te ara torotika o Wedderburn, e 5 kiromita i waho atu o Ranfurly. I maharatia ko te waka tēnā i whakamahia i te pāhua. I kōrero ia ki te Pūtahi Whakahaere: “Ranfurly to Ops, a 3T, registration OL5702, white Toyota Hilux flat deck.”
Kātahi ka ngū. Ka kore ana he mea anō i rongohia ake i a Pirihimana Umbers, ka tonoa he ope Pirihimana me te kaimahi waka tūroro ki taua wāhi. Ka tūpono rātou ki a Pirihimana Umbers i te taha o tōna waka, kua mate. E hikohiko tonu ana ngā raiti whero me te kahurangi o tōna waka Pirihimana.
Mārakerake ana te kitea kua tū tētahi riri whakarekereke, ā, kua tangohia hoki te pū hurihuri .38 me te matire PR24 a Pirihimana Umbers i te wā o te riri. He pērā rawa te kino o ōna tūnga, i pōhēhē kua pūhia ia. Engari, nō muri iho mai i whakatautia he nui rawa ngā tūnga māhunga nā ngā patunga o tētahi taputapu puhuki. I patua kinotia a Pirihimana Umbers ki tana matire PR24, ā mate noa ia. I pakaru te matire i te kaha o ngā kurukuru.
Ā ka tahuri ki te rapu i te kaihara. Ka whakamāraritia ngā whakatewhatewha Pirihimana i te mātao o te huarere, nā reira he maha hoki ngā pirihimana e mino koti ana nō te Whare Patuahi tūtata o Ranfurly. Taihoa, ā, ka kitea te Toyota Hilux e ahu ana ki te Puku o Ōtākou kei tua o te Lindis Pass. Ka aruaru te Pirihimana ka tū te kaihara, ka puta i te waka he raiwhara ki ōna ringaringa. Ka mauheretia e te Pirihimana. Ka kitea hoki e rātou te maha o ngā pū i te waka, ko te pū hurihuri a Pirihimana Umbers tētahi. Nō muri noa mai ka hāmenetia te kaihara 19 ōna tau ka mauheretia ia mō āke tonu atu mō te kōhurutanga o Pirihimana Umbers.
Ohorere katoa te Pirihimana me te hapori o te rohe, ā, me te ngau kino o te mamae i te kōhurutanga o tētahi Pirihimana kaingākau. I tū tōna uhunga i te Taiwhanga Hākinakina o Ranfurly i te korenga o tētahi whare karakia rarahi e mene katoa ai ngā puna roimata i hiahia ki te mau aroha atu.
Ka mahue mai i a Pirihimana Peter Umbers tōna hoa rangatira, a Sue, ā rāua kōtiro tokorua, e 8 tau, 10 tau ngā pakeke i tērā wā.
I whakawhiwhia murimatetia ia ki te Mētara o Hōri mō āna mahi māia.